«Чакан ГЭС» ААК жана «Гидроэнергетика курулушу боюнча Кыргыз-Кытай биргелешкен коому» ЖЧК мамлекеттик-жеке өнөктөштүк (МЖӨ) жөнүндө макулдашуунун алкагында Папан ГЭСин куруу долбоорун ишке ашырууну улантууда.

Орнотулган кубаттуулугу 30 МВт болгон Папан ГЭСи Ош облусунун Кара-Суу районунда жайгашкан Папан суу сактагычында курулууда. Учурда деривациялык тоннелди, ГЭСтин имаратын, суу кабыл алуучу түйүндү жана электр берүү чубалгысын куруу иштери жүргүзүлүүдө.

Бүгүнкү күндө деривациялык тоннелде болжол менен 300 метр казуу иштери аткарылды. Тоннелдин жалпы узундугу 1,5 чакырымды түзөт. Тоннель сууну гидроэлектр станциясынын имаратына жеткирүүгө арналган жана гидротехникалык комплекстин негизги объектилеринин бири болуп саналат.

Ошондой эле ГЭСтин имаратын куруу иштери уланууда. Учурда станциянын имараты үчүн котлованды казуу иштери жүргүзүлүп, суу кабыл алуучу жапкычтын шахтасын куруу иштери улантылууда. Мындан тышкары, чыңалуусу 110 кВ болгон аба электр чубалгысынын таянычтарын орнотуу боюнча иштердин олуттуу көлөмү аткарылды.

Папан ГЭСин куруу Кыргыз Республикасынын генерациялоочу кубаттуулуктарын өнүктүрүүгө багытталган иш-чаралардын бир бөлүгү болуп саналат. Долбоорду ишке ашыруу электр энергиясын өндүрүүнүн көлөмүн көбөйтүүгө жана электр менен камсыздоонун ишенимдүүлүгүн жогорулатууга мүмкүндүк берет.